کراچی(ایچ آراین ڈبلیو)کورنگی کے علاقے سنگر چورنگی کے قریب موٹرسائیکل سوار ملزمان نے پیٹرول پمپ کے کیشئیر سے 33 لاکھ روپے لوٹ لیے اور فرار ہو گئے۔ عوامی کالونی پولیس نے واقعے کا مقدمہ درج کر کے تفتیش کا آغاز کر دیا ہے۔
پولیس کے مطابق ڈکیتی کی واردات عوامی کالونی تھانے کی حدود سنگر چورنگی سیکٹر 27 کورنگی انڈسٹریل ایریا میں بالمقابل وار وینس سروس اسٹیشن پی ایس او پیٹرول پمپ کے قریب پیش آئی۔ واردات میں دو موٹرسائیکلوں پر سوار تین ڈاکوؤں نے پیٹرول پمپ کے کیشئیر سے اسلحے کے زور پر رقم چھینی۔
پیٹرول پمپ کے کیشئیر محمد عارف ولد محمد شریف نے پولیس کو بیان دیا کہ وہ لانڈھی کا رہائشی ہے اور وار وینس سروس اسٹیشن پی ایس او پیٹرول پمپ پر بطور اکاؤنٹنٹ ملازمت کرتا ہے۔ اس نے بتایا کہ 27 جنوری 2026 کو وہ پیٹرول پمپ کی 33 لاکھ روپے کی رقم امام بخش ولد محمد اسماعیل کے ہمراہ موٹرسائیکل پر سوار ہو کر جمع کرانے کے لیے جا رہا تھا۔
مدعی کے مطابق دن تقریباً 11 بج کر 5 منٹ پر جیسے ہی وہ پیٹرول پمپ سے نکلا تو دو موٹرسائیکلوں پر سوار تین افراد نے اسے روک لیا، اسلحہ تان کر پلاسٹک شاپر میں موجود 33 لاکھ روپے چھین لیے اور فرار ہو گئے۔
محمد عارف نے پولیس کو بتایا کہ ملزمان بول چال اور حلیے سے غیر مقامی اور نوجوان معلوم ہو رہے تھے، جنہیں سامنے آنے پر وہ پہچان سکتا ہے۔ واقعے کی اطلاع فوری طور پر مددگار 15 پر دی گئی، جس کے بعد عوامی کالونی تھانے کی پولیس موقع پر پہنچی اور فارنزک ٹیم کو طلب کر کے شواہد اکٹھے کیے۔
پولیس کے مطابق پیٹرول پمپ مالکان کی ہدایت پر مدعی نے تھانے آ کر رپورٹ درج کروائی۔ عوامی کالونی پولیس نے مدعی کے بیان کی روشنی میں 27 جنوری 2026 کو مقدمہ الزام نمبر 54/26 بجرم دفعہ 397/34 درج کر لیا ہے، جبکہ مقدمے کی تفتیش سی آئی سی کورنگی ڈویژن کراچی کے حوالے کر دی گئی ہے۔
پولیس کا کہنا ہے کہ ملزمان کی تلاش جاری ہے اور جلد انہیں گرفتار کر لیا جائے گا۔
