ٹوبہ ٹیک سنگھ(ایچ آراین ڈبلیو)ضلع ٹوبہ ٹیک سنگھ کے نواحی علاقے چک نمبر 297 گ ب اضافی آبادی میں پیش آنے والے افسوسناک حادثے نے علاقے کو سوگوار کر دیا۔ تالاب میں نہاتے ہوئے 19 سالہ نوجوان غلام مصطفیٰ ڈوب کر جاں بحق ہو گیا، جس سے اہلِ خانہ سمیت پورا علاقہ غم میں ڈوب گیا۔
تفصیلات کے مطابق غلام مصطفیٰ ولد محمد اشفاق، سکنہ چک نمبر 346 گ ب، شدید گرمی کے باعث اپنے ساتھیوں کے ہمراہ تالاب میں نہانے گیا تھا۔ نہاتے ہوئے وہ گہرے پانی میں چلا گیا اور چند ہی لمحوں میں حادثے کا شکار ہو گیا۔ خوشیوں بھرا ماحول یکدم ماتم میں تبدیل ہو گیا اور ایک ہنستا بستا گھر اجڑ گیا۔
اطلاع ملتے ہی ریسکیو 1122 کی ٹیمیں فوری طور پر موقع پر پہنچ گئیں اور وسیع پیمانے پر واٹر ریسکیو آپریشن شروع کیا گیا۔ ریسکیو حکام کے مطابق سرچ آپریشن میں جدید آلات، لائف رنگ، لائف بوائے، اسکوبا سرچ اور مقامی CERT ٹیموں کی مدد حاصل کی گئی۔ اس دوران 10 تربیت یافتہ ریسکیو اہلکاروں، ریسکیو ڈائیورز اور 5 مقامی غوطہ خوروں نے حصہ لیا، جنہوں نے کئی گھنٹوں کی انتھک کوششوں کے بعد نوجوان کی لاش تالاب سے نکال لی۔
ریسکیو ٹیم نے تمام قانونی تقاضے پورے کرنے کے بعد لاش ورثاء کے حوالے کر دی، جبکہ بعد ازاں میت کو ڈی ایچ کیو ہسپتال منتقل کیا گیا۔ واقعے کی خبر پھیلتے ہی اہلِ علاقہ کی بڑی تعداد غمزدہ خاندان کے گھر پہنچ گئی، جہاں ہر آنکھ اشکبار اور فضا سوگوار رہی۔
یہ افسوسناک واقعہ گرمی کے موسم میں نہروں، تالابوں اور گہرے پانی میں نہانے کے خطرناک رجحان کی تلخ یاد دہانی ہے۔ ماہرین اور ریسکیو حکام نے والدین سے اپیل کی ہے کہ وہ بچوں اور نوجوانوں کو ایسے خطرناک مقامات پر جانے سے روکیں اور حفاظتی تدابیر سے آگاہ کریں۔
ریسکیو 1122 نے شہریوں سے گزارش کی ہے کہ نہروں اور تالابوں میں نہاتے وقت انتہائی احتیاط برتیں، کم عمر بچوں کو اکیلے نہ جانے دیں اور کسی بھی ہنگامی صورتحال میں فوری طور پر ریسکیو 1122 کو اطلاع دیں تاکہ قیمتی انسانی جانوں کو بچایا جا سکے۔
