کراچی (ایچ آراین ڈبلیو) سندھ کے سینئر وزیر شرجیل انعام میمن نے پنجاب حکومت پر سیلاب متاثرین کے معاملے پر سخت تنقید کرتے ہوئے کہا ہے کہ “ہم 120 روپے کے جوس اور چپس کے ساتھ 300 روپے کا تصویری پیکٹ نہیں بنواتے”، انہوں نے پنجاب حکومت پر فوٹو سیشنز کو ترجیح دینے کا الزام عائد کیا۔
سیلاب متاثرین پر تنقید:
شرجیل میمن نے کہا کہ سیلاب متاثرین پر سیاست کرنا افسوسناک اور شرمناک عمل ہے۔ ان کا کہنا تھا کہ “صرف بیانات اور تصاویر سے کچھ نہیں ہوگا، متاثرین کی عملی مدد کی جائے۔ جنوبی پنجاب کے عوام حکومت کو پکار رہے ہیں لیکن وہاں فوٹو سیشنز ترجیح بن چکے ہیں۔”
پنجاب حکومت کو للکار:
سندھ کے وزیر نے پنجاب حکومت کو مخاطب کرتے ہوئے کہا کہ “خدارا کیمرے ہٹائیں اور متاثرین کی مدد کو پہنچیں۔ پنجاب میں نہ گھر بن رہے ہیں اور نہ ہی سولر پینل دیے جا رہے ہیں، بلکہ صرف بھاشن دیے جا رہے ہیں۔”
سندھ حکومت کے دعوے:
انہوں نے سندھ حکومت کے اقدامات گنواتے ہوئے کہا کہ “اس کے برعکس سندھ حکومت 21 لاکھ گھر اور سولر پینل فراہم کر رہی ہے۔ عوامی خدمت اور دکھاوے کی سیاست میں یہی فرق ہے۔”
سیاسی صورت حال:
شرجیل میمن کے بیانات اس وقت سامنے آئے ہیں جب پیپلز پارٹی اور مسلم لیگ (ن) کے درمیان اختلافات مسلسل بڑھ رہے ہیں اور دونوں جماعتیں ایک دوسرے پر الزام تراشی میں مصروف ہیں۔
انہوں نے پنجاب حکومت کے طریقہ کار پر تنقید کرتے ہوئے کہا کہ “قوم مصیبت میں ہو اور ہم چھٹیاں منائیں؟ ہم ہر روز عوام کے درمیان ہوتے ہیں، جبکہ پنجاب حکومت صرف سیاست اور فوٹو سیشن کر رہی ہے۔”
