کراچی(ایچ آراین ڈبلیو) محکمہ موسمیات نے ایک اہم انتباہ جاری کرتے ہوئے بتایا ہے کہ خلیج بنگال میں تشکیل پانے والا ایک طوفانی نظام بحیرہ عرب کی طرف بڑھ رہا ہے، جس کے زیریں سندھ اور کراچی سمیت ساحلی علاقوں پر اثرات مرتب ہونے کا امکان ہے۔
موسمی تبدیلیوں کی تفصیلات:
ساحلی علاقوں کے لیے انتباہ: نظام کے باعث سمندر میں ہوائیں بند رہیں گی، جبکہ 29 اور 30 ستمبر کو تھرپارکر، عمرکوٹ، بدین، سجاول اور سانگھڑ کے اضلاع میں گرج چمک کے ساتھ ہلکی سے درمیانی بارش متوقع ہے۔
کراچی کے لیے پیشنگوئی: شہر میں شدید گرمی کے بعد 30 ستمبر کو دوپہر یا شام میں ہلکی بارش ہو سکتی ہے۔
اگلے تین دنوں کا موسم: پیر، منگل اور بدھ کے دوران کراچی کا موسم گرم اور مرطوب رہنے کا امکان ہے، جہاں زیادہ سے زیادہ درجہ حرارت 35 سے 37 ڈگری سینٹی گریڈ تک پہنچ سکتا ہے۔
محکمہ موسمیات نے شہریوں اور ساحلی علاقوں کے رہائشیوں سے احتیاطی تدابیر اختیار کرنے کی اپیل کی ہے۔
