کراچی (ایچ آر این ڈبلیو): ڈاکٹر مشعل کریم، جو اپنے شوہر کے رویے سے دلبرداشتہ ہو کر نالے میں چھلانگ لگا کر غائب ہوگئی تھیں، کا دوسرے روز بھی کوئی سراغ نہیں مل سکا۔ ریسکیو اداروں کے غوطہ خوروں کی تلاش کا آپریشن جاری ہے، لیکن اب تک کوئی خوشخبری نہیں مل سکی۔
ریسکیو ٹیموں نے غوطہ خوری اور دیگر ذرائع سے مسلسل کوششوں کے باوجود اب تک ڈاکٹر مشعل کا پتہ نہیں لگایا جا سکا ۔ڈاکٹر مشعل کریم نے دو سال قبل اپنے شوہر سے پسند کی شادی کی تھی۔ حالیہ عرصے میں دونوں کے درمیان جھگڑوں کا سلسلہ جاری تھا، جس کی وجہ شوہر کی دوسری شادی کا ارادہ بتایا جا رہا ہے ۔ خاندان کے مطابق، شوہر کے رویے نے ڈاکٹر مشعل کو انتہائی مایوسی میں دھکیل دیا تھا۔
شوہر کے خلاف قانونی کارروائی کا امکان، لیکن فی الحال تلاش کے عمل کو ترجیح دی جا رہی ہے۔پولیس لواحقین سے مسلسل رابطے میں ہے اور کوئی بھی نئی معلومات موصول ہونے پر فوری عملدرآمد کیا جا رہا ہے ۔غوطہ خوروں کی ٹیمیں نالے اور اس کے اردگرد کے علاقوں میں سرچ آپریشن جاری رکھے ہوئے ہیں۔
آپریشن میں تکنیکی وسائل بھی استعمال کیے جا رہے ہیں، لیکن اب تک کامیابی نہیں مل سکی۔خاندان نے عوام اور حکام سے مدد کی اپیل کرتے ہوئے کہا ہے کہ اگر کسی کو بھی ڈاکٹر مشعل کے بارے میں کوئی معلومات ہوں، تو وہ فوری طور پر ریسکیو اداروں یا پولیس سے رابطہ کریں۔
یہ واقعہ گھریلو تشدد اور نفسیاتی مسائل کے باعث پیدا ہونے والے المیوں کی طرف ایک اور سنگین اشارہ ہے، جس پر فوری توجہ کی ضرورت ہے۔
