حیدرآباد(ایچ آراین ڈبلیو)کمشنر حیدرآباد ڈویژن فیاض حسین عباسی نے سیکنڈری اسکول سرٹیفکیٹ (SSC) پارٹ I اور II کے سالانہ امتحانات 2026 کے پرامن اور شفاف انعقاد کے لیے سخت اقدامات کا اعلان کیا ہے۔
نوٹیفکیشن کے مطابق، امتحانی مراکز اور ان کے اطراف کے علاقوں میں دفعہ 144 نافذ کر دی گئی ہے، جو 7 اپریل سے 17 اپریل 2026 تک لاگو رہے گی۔ امتحانی مراکز کو محدود علاقہ (Restricted Area) قرار دے دیا گیا ہے، جہاں صرف وہ امیدوار داخل ہو سکیں گے جن کے پاس اصل ایڈمٹ کارڈ ہوگا، جبکہ ڈیوٹی پر مامور عملہ بھی داخلہ حاصل کر سکتا ہے۔ عام عوام کا داخلہ مکمل طور پر ممنوع ہوگا۔
امتحانی اوقات کے دوران مراکز کے قریب واقع تمام فوٹو اسٹیٹ مشینوں کو چلانے پر بھی پابندی ہوگی تاکہ کسی بھی قسم کی غیر قانونی سرگرمی یا پیپر کی نقل کو روکا جا سکے۔
انسپکٹر رینک اور اس سے اعلیٰ پولیس افسران کو اختیار دیا گیا ہے کہ دفعہ 144 کی خلاف ورزی کرنے والوں کے خلاف دفعہ 188 تعزیراتِ پاکستان کے تحت کارروائی کریں اور ایف آئی آر درج کریں۔
کمشنر حیدرآباد نے یہ احکامات چیئرمین تعلیمی بورڈ حیدرآباد کی درخواست پر جاری کیے تاکہ امتحانات کی شفافیت اور تقدس کو برقرار رکھا جا سکے۔ نقول آئی جی سندھ، ڈی آئی جی حیدرآباد، اور تمام متعلقہ ڈپٹی کمشنرز کو کارروائی کے لیے ارسال کر دی گئی ہیں۔
