کراچی(ایچ آراین ڈبلیو)یوٹیوب پر نواب آف جونا گڑھ فیملی کے خلاف مبینہ جھوٹی ویڈیو بنانے کے معاملے میں سائبر کرائم نے ملزم مدثر خان کو عدالت میں پیش کیا۔ عدالت نے ملزم کا جسمانی ریمانڈ 28 جنوری تک منظور کر لیا اور آئندہ سماعت پر پیشرفت رپورٹ طلب کر لی۔
تفتیشی افسر کے مطابق ملزم اور اس کے ساتھیوں نے یوٹیوب چینل “The legends” پر مدعیہ اور اس کے خاندان کی کردار کشی کرتے ہوئے جھوٹ پر مبنی ویڈیو اپلوڈ کی تھی۔ ملزم کو اسلام آباد سے گرفتار کر کے راہداری ریمانڈ کے بعد کراچی منتقل کیا گیا ہے۔
سائبر کرائم ایجنسی مزید تفتیش کر رہی ہے تاکہ ویڈیو بنانے اور پھیلانے میں ملوث دیگر افراد کو بھی گرفتار کیا جا سکے۔ مقدمہ نواب آف جونا گڑھ کی بیٹی کی مدعیت میں درج کیا گیا تھا۔
