تہران(ایچ آراین ڈبلیو)ایران نے امریکا کی جانب سے حالیہ بیانات پر سخت ردِعمل دیتے ہوئے واضح کیا ہے کہ کسی بھی قسم کی مداخلت کو ہرگز برداشت نہیں کیا جائے گا۔ ایرانی حکام کا کہنا ہے کہ “مداخلت کرنے والا ہاتھ منزل تک پہنچنے سے پہلے ہی کاٹ دیا جائے گا۔”
یہ ردِعمل سابق امریکی صدر ڈونلڈ ٹرمپ کے بیان کے بعد سامنے آیا ہے۔ ایرانی عہدیدار علی شیخانی نے کہا کہ ہم عراق، افغانستان اور غزہ میں امریکی مداخلت اور اس کے تباہ کن نتائج کو بخوبی دیکھ چکے ہیں، جہاں نام نہاد مداخلت نے امن کے بجائے تباہی اور عدم استحکام کو جنم دیا۔
علی شیخانی کا کہنا تھا کہ ایرانی عوام امریکا کے نام نہاد “ریسکیو” سے اچھی طرح واقف ہیں اور کسی بھی بیرونی دباؤ یا مداخلت کو مسترد کرتے ہیں۔ انہوں نے مزید کہا کہ ایران اپنی خودمختاری، سلامتی اور قومی مفادات کے تحفظ کے لیے ہر ممکن اقدام کرے گا۔
ایرانی قیادت نے اس عزم کا اعادہ کیا کہ خطے میں امن و استحکام کے لیے بیرونی مداخلت کے بجائے خود مختار اور باہمی احترام پر مبنی پالیسی ناگزیر ہے۔
