کوئٹہ(ایچ آراین ڈبلیو) صوبائی ٹرانسپورٹ اتھارٹی نے مسافروں کی حفاظت کو یقینی بنانے کے لیے بلوچستان بھر میں تمام مسافر کوچوں میں سی سی ٹی وی کیمرے نصب کرنے اور مرکزی مانیٹرنگ سیل قائم کرنے کا فیصلہ کیا ہے۔
سیکرٹری پرووینشل ٹرانسپورٹ اتھارٹی وحید شریف عمرانی کی زیرصدارت ہونے والے اجلاس میں یہ اہم فیصلہ کیا گیا، جس میں ٹرانسپورٹ یونین کے عہدیداروں اور محکماتی افسران نے شرکت کی۔
اجلاس میں طے پایا کہ:
صوبے کے تمام مسافر کوچوں میں جدید سی سی ٹی وی کیمرے نصب کیے جائیں گے
کیمرے کی ریکارڈنگ کو محفوظ طریقے سے محفوظ کیا جائے گا
نظام کی نگرانی کے لیے ایک مرکزی مانیٹرنگ سیل قائم کیا جائے گا
سیکرٹری ٹرانسپورٹ نے کہا کہ “مسافروں کا تحفظ حکومت بلوچستان کی اولین ترجیح ہے۔ اس نظام کے نفاذ سے نہ صرف سیکورٹی میں بہتری آئے گی بلکہ حادثات اور جرائم کی صورت میں فوری کارروائی ممکن ہو سکے گی۔”
ٹرانسپورٹ یونین کے نمائندوں نے اس فیصلے کا خیرمقدم کرتے ہوئے حکومت کو مکمل تعاون کی یقین دہانی کرائی ہے۔ توقع ہے کہ آنے والے چند ہفتوں میں یہ نظام صوبے بھر میں فعال ہو جائے گا۔
