ٹوکیو(ایچ آراین ڈبلیو)جاپان نے امریکہ کے ساتھ ایک بڑا اقتصادی معاہدہ کیا ہے جس کے تحت وہ 550 ارب ڈالر (410 ارب پاؤنڈ) امریکی منصوبوں میں سرمایہ کاری کرے گا۔ معاہدے کے مطابق جاپان آہستہ آہستہ اپنی معیشت کو امریکی مصنوعات، بالخصوص گاڑیوں اور چاول کی درآمد کے لیے کھولے گا۔
امریکہ اور جاپان کے درمیان یہ معاہدہ ایسے وقت میں سامنے آیا ہے جب دونوں ممالک دفاعی اور اقتصادی میدان میں ایک دوسرے کے مزید قریب آ رہے ہیں۔ ماہرین کے مطابق یہ معاہدہ ایشیائی خطے میں طاقت کے توازن پر بھی اثر ڈالے گا۔
وائٹ ہاؤس نے اعلان کیا ہے کہ جاپان کی سرمایہ کاری بنیادی ڈھانچے، توانائی اور جدید ٹیکنالوجی کے منصوبوں میں استعمال کی جائے گی۔ معاہدے کے تحت امریکی کار ساز ادارے اور زرعی برآمد کنندگان کو جاپان میں نئی منڈی تک رسائی ملے گی۔
اقتصادی ماہرین اس معاہدے کو “ون ون صورتحال” قرار دے رہے ہیں، تاہم جاپان میں اپوزیشن جماعتوں نے خدشہ ظاہر کیا ہے کہ امریکی مصنوعات کی یلغار مقامی صنعت کو نقصان پہنچا سکتی ہے۔
امریکہ اور جاپان کا یہ معاہدہ نہ صرف معاشی تعلقات کو مضبوط کرے گا بلکہ سیاسی اور دفاعی تعاون کی بنیادوں کو بھی گہرا کرے گا۔ تاہم سوال یہ ہے کہ کیا جاپان اپنی مقامی صنعت اور کسانوں کے خدشات کو نظر انداز کرتے ہوئے اس بڑے فیصلے پر قائم رہ پائے گا؟ وقت ہی اس کا جواب دے گا۔
