اسلام آباد(ایچ آراین ڈبلیو)سپریم کورٹ آف پاکستان نے سانحہ بلدیہ فیکٹری کیس میں اہم فیصلہ سناتے ہوئے ملزمان رحمان عرف بھولا اور زبیر عرف چریا کو باعزت بری کر دیا ہے۔
عدالتی کارروائی کے دوران فریقین کے وکلا نے دلائل دیتے ہوئے مؤقف اختیار کیا کہ 2013 میں گرفتار ہونے والے رضوان قریشی کے بیان کی بنیاد پر جے آئی ٹی تشکیل دی گئی، جس کے بعد 2016 میں مزید گرفتاریاں عمل میں آئیں۔ وکیل حسان صابر کے مطابق مقدمے میں اہم گواہی اور شواہد کے حوالے سے خلا موجود تھا۔
عدالت کو بتایا گیا کہ فیکٹری کے منیجر منصور کو بھی معاملے سے جوڑا گیا تھا، تاہم اس پر باقاعدہ مقدمہ درج نہ کیے جانے پر بھی سوالات اٹھائے گئے۔
سماعت کے دوران عدالت نے استفسار کیا کہ اگر منصور رحمان بھولا کا قریبی تھا تو اسے مقدمے میں کیوں شامل نہیں کیا گیا۔ عدالت نے وکلا سے مختلف قانونی نکات پر بھی وضاحت طلب کی۔
لواحقین کے وکیل فیصل صدیقی نے عدالت میں مؤقف اختیار کیا کہ وہ ہائی کورٹ کے فیصلے کی توثیق نہیں کرتے، تاہم عدالت نے تفصیلی دلائل سننے کے بعد فیصلہ سنایا۔
سپریم کورٹ نے نہ صرف ملزمان کو بری الذمہ قرار دیا بلکہ ہائی کورٹ کی جانب سے ایم کیو ایم پاکستان سے متعلق ریمارکس کو بھی کالعدم قرار دے دیا۔
عدالتی فیصلے کے بعد یہ مؤقف سامنے آیا ہے کہ سانحہ بلدیہ فیکٹری کیس میں گرفتار ہونے والے ملزمان کو باعزت بری کیا گیا ہے، جسے ایک اہم عدالتی پیش رفت قرار دیا جا رہا ہے۔
