اسلام آباد(ایچ آراین ڈبلیو)پاکستان مبینہ طور پر چین کے جدید J-35 اسٹیلتھ لڑاکا طیاروں کا پہلا بین الاقوامی خریدار بننے والا ہے۔ ذرائع کے مطابق پاکستان نے اپنی فضائیہ کی صلاحیتوں کو جدید تقاضوں سے ہم آہنگ کرنے کے لیے 40 طیارے حاصل کرنے کا منصوبہ بنایا ہے، جس سے پاکستان ایئر فورس کی آپریشنل طاقت میں نمایاں اضافہ متوقع ہے۔
جنگی طیاروں کی یہ ممکنہ خریداری چین کے ساتھ وسیع تر دفاعی تعاون کا حصہ سمجھی جا رہی ہے، جو دونوں ممالک کے اسٹریٹجک تعلقات کی عکاس ہے۔ یہ اقدام حالیہ پاکستان بھارت کشیدگی کے دوران J-10 لڑاکا طیاروں کے ساتھ پاکستان کے مثبت تجربے کے تسلسل کے طور پر دیکھا جا رہا ہے۔
دفاعی ماہرین کے مطابق J-35 جیسے اسٹیلتھ طیاروں کے حصول سے پاکستان کی اگلی نسل (Next Generation) فضائی جنگی صلاحیتوں میں اضافہ ہوگا، جبکہ خطے میں فوجی توازن اور مقابلے کی نوعیت مزید پیچیدہ اور شدید ہو سکتی ہے۔ تاہم حکام کی جانب سے اس ممکنہ معاہدے کی باضابطہ تصدیق تاحال سامنے نہیں آئی۔
