کراچی(ایچ آراین ڈبلیو)مراد علی شاہ نے گل پلازہ سانحے کے متاثرین کے لیے حکومتِ سندھ کی جانب سے 7 ارب روپے کے جامع مالی امدادی پیکج کا اعلان کرتے ہوئے 200 تصدیق شدہ متاثرین میں 51 کروڑ 17 لاکھ روپے کے معاوضے کے چیکس تقسیم کر دیے۔ حکومت کے مطابق اس پیکج میں سے 56 ارب 57 کروڑ روپے کی رقم حاصل کر لی گئی ہے۔
وزیراعلیٰ نے سی ایم ہاؤس میں منعقدہ تقریب سے بطور مہمانِ خصوصی خطاب کرتے ہوئے کہا کہ گل پلازہ کا سانحہ ایک المناک واقعہ تھا جس نے متعدد خاندانوں اور تاجر برادری کو شدید انسانی و مالی نقصان پہنچایا۔تقریب میں صوبائی وزرا، چیف سیکریٹری، مرتضیٰ وہاب، کمشنر کراچی، کراچی چیمبر آف کامرس اینڈ انڈسٹری کے نمائندگان بشمول زبیر موتی والا، اور متاثرین کی بڑی تعداد نے شرکت کی۔
وزیراعلیٰ نے کہا کہ حکومتِ سندھ، پاکستان پیپلز پارٹی کی قیادت اور بے نظیر بھٹو کے وژن کے تحت، پہلے دن سے متاثرین کو فوری اور طویل المدتی ریلیف فراہم کرنے کے لیے پرعزم ہے۔انہوں نے بتایا کہ پہلے مرحلے میں 72 جاں بحق افراد کے لواحقین کے لیے فی کس ایک کروڑ روپے کے معاوضے کا اعلان کیا گیا تھا، جن میں سے 64 کیسز میں ادائیگیاں مکمل ہو چکی ہیں، چار کیسز کی تصدیق جاری ہے جبکہ چار قانونی ورثا سے متعلق مسائل کے باعث زیرِ التوا ہیں۔
دوسرے مرحلے میں 849 متاثرہ دکانداروں کو رمضان کے دوران فوری ریلیف کے طور پر فی کس پانچ لاکھ روپے فراہم کیے گئے تاکہ وہ اپنے کاروبار کی بحالی کا آغاز کر سکیں۔وزیراعلیٰ کے مطابق مجموعی 7 ارب روپے کے پیکج میں سے 56 ارب 57 کروڑ روپے اکاؤنٹنٹ جنرل آفس کے ذریعے حاصل کیے جا چکے ہیں، جنہیں کے سی سی آئی کی جانب سے فراہم کردہ جائزوں کی بنیاد پر متاثرین میں تقسیم کیا جا رہا ہے۔ موجودہ مرحلے میں 200 تصدیق شدہ متاثرین میں 51 کروڑ 17 لاکھ روپے کے چیکس دیے گئے ہیں، جبکہ باقی دعویداروں کو تصدیق کے بعد ادائیگیاں کی جائیں گی۔
کے سی سی آئی کے اندازوں کے مطابق گل پلازہ میں 1,209 دکانیں تھیں اور معاوضے کا تعین اسٹاک اور انوینٹری نقصانات کی بنیاد پر کیا جا رہا ہے۔وزیراعلیٰ نے متاثرین سے اظہارِ یکجہتی کرتے ہوئے کہا کہ کوئی بھی مالی امداد ہونے والے نقصان کا مکمل ازالہ نہیں کر سکتی، تاہم حکومت ہر متاثرہ فرد کی بحالی کے لیے پرعزم ہے۔ انہوں نے یقین دلایا کہ تمام تصدیق شدہ متاثرین کو معاوضہ دیا جائے گا اور کسی کو نظرانداز نہیں کیا جائے گا۔
مراد علی شاہ نے متاثرہ خاندانوں اور تاجر برادری کے حوصلے کو سراہتے ہوئے کہا کہ حکومت مستقبل میں ایسے سانحات کی روک تھام کے لیے حفاظتی اور احتیاطی اقدامات مزید مضبوط کرے گی، جبکہ معاوضوں کی شفاف تقسیم میں کے سی سی آئی کے کردار کو بھی سراہا۔
