کراچی(ایچ آراین ڈبلیو) مصطفیٰ عامر قتل کیس کے مرکزی ملزم ارمغان کے خلاف پولیس مقابلہ اور اقدام قتل کے مقدمے میں اہم پیش رفت ہوئی ہے۔ ملزم ارمغان نے انسداد دہشت گردی عدالت پر عدم اعتماد کا اظہار کرتے ہوئے کیس دوسری عدالت میں منتقل کرنے کی درخواست دائر کی ہے۔
ملزم کے خلاف مقدمات انسداد دہشت گردی کی عدالت نمبر 7 میں زیر سماعت ہیں، جہاں درخواست دی گئی کہ انسداد دہشت گردی کی منتظم عدالت اسے دوسری عدالت کو منتقل کرے۔ عدالت نے کیس کی سماعت 20 اپریل تک ملتوی کر دی۔
پولیس کی جانب سے عدالت کو اطلاع دی گئی کہ 8 فروری 2025 کو ملزم ارمغان کی گرفتاری کے لیے اس کے گھر چھاپہ مارا گیا، تاہم چھاپے کے دوران ارمغان نے پولیس پر فائرنگ کی۔ اس دوران ڈی ایس پی احسن ذوالفقار شدید زخمی ہوگئے، جنہیں علاج کے دوران شہید قرار دیا گیا۔
پولیس نے مقدمے میں قتل کی دفعہ شامل کرنے اور ملزم ارمغان پر قتل کی دفعہ کے تحت ترمیمی فرد جرم عائد کرنے کی استدعا بھی کی ہے۔
یہ پیش رفت اس بات کی نشاندہی کرتی ہے کہ انسداد دہشت گردی عدالت میں مقدمہ مزید سخت قانونی کارروائی کے لیے تیار ہے۔
