اسلام آباد(ایچ آراین ڈبلیو)فیلڈ مارشل سید عاصم منیر, NI (M), HJ، چیف آف آرمی اسٹاف اور چیف آف ڈیفنس اسٹاف نے محمد شہباز شریف کے ساتھ قطر کے وزیر اعظم اور وزیر خارجہ شیخ محمد بن عبدالرحمن بن جاسم الثانی سے ملاقات کی۔ ملاقات میں نائب وزیراعظم اسحاق ڈار, وفاقی وزیر اطلاعات و نشریات اور وزیراعظم کے معاون خصوصی طارق فاطمی بھی موجود تھے۔
دونوں رہنماؤں نے دوطرفہ تعلقات، علاقائی اور بین الاقوامی پیش رفت پر تبادلہ خیال کیا اور پاکستان اور قطر کے درمیان مضبوط برادرانہ تعلقات پر زور دیا۔ انہوں نے سیاسی، اقتصادی اور ادارہ جاتی روابط میں بڑھتی ہوئی رفتار پر اطمینان کا اظہار کیا۔
ملاقات میں تجارت اور سرمایہ کاری، توانائی، دفاع، مزدوروں کی نقل و حرکت اور ثقافتی تعاون میں اضافہ کرنے کے مواقع پر بات چیت ہوئی، اور ان شعبوں میں تعاون کو تیز کرنے کے لیے دونوں ممالک کی مشترکہ ٹاسک فورس کے قیام پر اتفاق کیا گیا۔ علاوہ ازیں مشترکہ وزارتی کمیشن اور دوطرفہ سیاسی مشاورت کے ذریعے کیے گئے فیصلوں پر عمل درآمد کی اہمیت پر بھی زور دیا گیا۔
علاقائی مسائل، بشمول غزہ کی صورتحال اور خلیجی سلامتی پر بھی گفتگو ہوئی۔ وزیراعظم محمد شہباز شریف نے خطے میں مذاکرات کو فروغ دینے اور کشیدگی میں کمی کے لیے قطر کی تعمیری سفارتی کوششوں کو سراہا۔ دونوں رہنماؤں نے تنازعات کے پرامن حل اور اقوام متحدہ کے چارٹر سمیت بین الاقوامی قوانین کی پاسداری کی اہمیت پر زور دیا۔
ملاقات کے اختتام پر پاکستان اور قطر نے سٹریٹجک شراکت داری کو مزید مضبوط بنانے اور دوطرفہ، علاقائی اور بین الاقوامی امور پر رابطے میں رہنے کے مشترکہ عزم کا اعادہ کیا۔
