لاہور(ایچ آراین ڈبلیو)سیدنا عثمان مروندی المعروف حضرت لعل شہباز قلندر کے 774 ویں عرس کی تقریبات کی تیاریوں کے سلسلے میں ہزاروں زائرین قلندری کی نگری پہنچ گئے ہیں۔ 3 روزہ عرس کی تقریبات 18 شعبان سے شروع ہوں گی، جبکہ رسمی آغاز 7 فروری سے ہوگا۔
ملک کے مختلف شہروں، خاص طور پر پنجاب سے زائرین کی آمد ٹرینوں، وینز، کوچز اور ذاتی گاڑیوں کے ذریعے ہو رہی ہے۔ مقامی ذرائع کے مطابق گاڑی مالکان نے کرایے اپنی مرضی کے مطابق مقرر کیے ہیں۔
عرس کی تقریبات کے سلسلے میں شہر کے مختلف مقامات پر روانگی سے قبل زائرین کا دھمال کا سلسلہ جاری ہے، جو حضرت لعل شہباز قلندر کی عقیدت اور روحانی محبت کی علامت ہے۔ انتظامیہ نے زائرین کی سہولت اور سیکیورٹی کے لیے خصوصی انتظامات کیے ہیں تاکہ تین روزہ تقریبات پرسکون اور منظم انداز میں منعقد ہو سکیں۔
