کراچی(ایچ آراین ڈبلیو)سندھ بھر میں نجی اسکولوں میں پیش آنے والے آتشزدگی کے واقعات کے پیشِ نظر حکومتِ سندھ نے فائر سیفٹی اور حفاظتی اقدامات پر سختی سے عملدرآمد کی ہدایات جاری کر دی ہیں۔
ڈائریکٹوریٹ آف انسپیکشن اینڈ رجسٹریشن آف پرائیویٹ انسٹی ٹیوشنز، محکمہ اسکول ایجوکیشن اینڈ لٹریسی سندھ کی ایڈیشنل ڈائریکٹر پروفیسر رفیعہ ملاح کی جانب سے جاری کردہ سرکاری مراسلے کے مطابق تمام نجی اسکولوں کو فوری طور پر جامع فائر سیفٹی پروٹوکولز نافذ کرنے کی پابندی عائد کر دی گئی ہے۔
مراسلے میں کہا گیا ہے کہ تمام نجی اسکول عمارتوں میں ہر فلور پر فعال فائر الارمز، اسموک ڈیٹیکٹرز اور فائر ایکسٹنگوئشرز کی تنصیب لازمی ہوگی، جبکہ ان حفاظتی آلات کی باقاعدہ جانچ، سروسنگ اور دیکھ بھال کو یقینی بنانا بھی انتظامیہ کی ذمہ داری قرار دیا گیا ہے۔
سرکاری مراسلے کے مطابق ہنگامی اخراج کے راستے اور سیڑھیاں ہر وقت کھلی رکھنا لازم ہوگا، جنہیں نمایاں طور پر نشان زدہ اور ہر قسم کی رکاوٹوں سے پاک رکھا جائے گا تاکہ کسی بھی ہنگامی صورتحال میں طلبہ اور عملہ محفوظ طریقے سے باہر نکل سکے۔
مزید ہدایات میں کہا گیا ہے کہ اسکولوں میں بجلی کی وائرنگ، لیبارٹریز، کچن، جنریٹر رومز اور دیگر حساس مقامات کا وقتاً فوقتاً مستند ماہرین کے ذریعے معائنہ کروانا لازمی ہوگا تاکہ آتشزدگی اور برقی حادثات کے خدشات کو کم سے کم کیا جا سکے۔
حکومتِ سندھ نے واضح کیا ہے کہ ہدایات پر عملدرآمد نہ کرنے والے نجی اسکولوں کے خلاف قواعد و ضوابط کے تحت سخت کارروائی عمل میں لائی جائے گی۔
