کراچی(ایچ آراین ڈبلیو) وزیراعلیٰ سندھ سید مراد علی شاہ نے داؤد یونیورسٹی آف انجینئرنگ اینڈ ٹیکنالوجی (DUET) کراچی کے 13ویں کنوکیشن سے خطاب کرتے ہوئے کہا کہ جامعہ نے مختصر عرصے میں غیر معمولی ترقی کرکے ایک نئی مثال قائم کی ہے۔ انہوں نے کہا کہ 2023 کے بعد DUET میں حقیقی رینیسانس کا آغاز ہوا جس نے جامعہ کو ترقی، استحکام اور معیار کی نئی بلندیوں تک پہنچا دیا۔
وزیراعلیٰ سندھ نے بتایا کہ یونیورسٹی نے اپنے وسائل سے 75 کروڑ روپے کی لاگت سے انفراسٹرکچر بہتر کیا جبکہ جدید آڈیٹوریم، اسپورٹس گراؤنڈ اور طلبہ کی رہائش گاہوں کی تعمیر بھی تیزی سے مکمل کی جارہی ہے۔ گلبرگ کیمپس میں I&CS فیکلٹی، AVR لیبز، نئی کلاس رومز اور میٹیریل، پٹرولیم، انوائرمنٹ اینڈ انرجی کی خصوصی لیبز قائم کی جا رہی ہیں۔
مراد علی شاہ نے کہا کہ DUET نے مالی مشکلات سے نکل کر ایک مضبوط اور خود کفیل ادارے کا سفر کامیابی سے طے کیا ہے، جو شفاف انتظام اور نئی آمدنی کے ماڈلز کا نتیجہ ہے۔ انہوں نے مزید کہا کہ یونیورسٹی نے QS ایشیا رینکنگ، SDG ٹائمز انڈیکس اور یوتھ ڈیولپمنٹ پروگرام میں نمایاں بہتری حاصل کی ہے، جہاں YPR اسکور 53 فیصد سے بڑھ کر 84.13 فیصد تک پہنچ گیا۔
وزیراعلیٰ سندھ نے وائس چانسلر انجینئر پروفیسر ڈاکٹر سمرین حسین (S.I، T.I) کی غیر معمولی قیادت کو سراہتے ہوئے کہا کہ ان کا کیریئر یونیورسٹی کی ترقی کا بنیادی باعث ہے۔ ڈاکٹر سمرین کو پاکستان کی پہلی خاتون انجینئرنگ وائس چانسلر ہونے کا اعزاز حاصل ہے۔ انہوں نے 50 سے زائد تحقیقی اشاعتیں اور 300 سے زائد علمی مقالات تحریر کیے، جبکہ خسارے میں چلنے والے ادارے کو سرپلس میں تبدیل کرنا ان کی قیادت کا ثبوت ہے۔
کنوکیشن کے دوران بتایا گیا کہ اس سال 620 میں سے 413 طلبہ فارغ التحصیل ہوئے، جن میں سے 66 فیصد پہلے ہی ملازمت حاصل کرچکے ہیں جبکہ جامعہ کے مکمل ڈگری ہولڈرز کی روزگار پذیری تقریباً 100 فیصد تک جا پہنچی ہے۔ اس شاندار کامیابی میں مائیکرو ڈگری پروگرام، صنعت سے روابط اور سابق طلبہ کی کاوشوں نے اہم کردار ادا کیا۔
وزیراعلیٰ سندھ نے فارغ التحصیل طلبہ کو مبارکباد دیتے ہوئے کہا کہ وہ دیانتداری، جدت اور خدمت کے جذبے کے ساتھ عملی میدان میں قدم رکھیں۔ انہوں نے والدین، اساتذہ اور عملے کی محنت و استقامت کو بھی خراجِ تحسین پیش کیا۔
