لاہور(ایچ آراین ڈبلیو)حالیہ سیلاب نے پنجاب میں مواصلاتی نظام کو شدید نقصان پہنچایا ہے جس کے باعث قومی اور ضلعی سطح کی 200 سے زائد سڑکیں متاثر ہو چکی ہیں۔ پنجاب ڈیزاسٹر مینجمنٹ اتھارٹی (پی ڈی ایم اے) کے مطابق ایم 5 موٹروے کے 13 مقامات پر شدید نقصان ہوا ہے۔
پی ڈی ایم اے کے ڈائریکٹر جنرل عرفان علی کاٹھیا نے بتایا کہ موٹروے کے مزید چار سے پانچ مقامات پر بھی نقصان کا خدشہ ہے، جس کے باعث ایم 5 موٹروے 15ویں روز بھی بند ہے۔ انہوں نے کہا کہ سیلاب نے صوبے کے 27 اضلاع کو متاثر کیا ہے۔
موٹر وے پولیس کے ترجمان عمران شاہ نے مسافروں کو بتایا کہ ملتان سے سکھر جانے کے لیے شاہ شمس انٹرچینج سے قومی شاہراہ کے راستے اوچ شریف انٹرچینج تک کا متبادل راستہ استعمال کیا جا سکتا ہے۔
حکومتی اعداد و شمار کے مطابق سیالکوٹ، گجرات، حافظ آباد اور نارووال میں ریکارڈ بارشوں کے باعث شہری سیلاب آیا، جبکہ دریائے ستلج، بیاس اور راوی میں 40 سالہ ریکارڈ سیلاب نے وسیع پیمانے پر تباہی مچائی۔ حکومت متاثرہ علاقوں میں بحالی کے سروے کا آغاز کر چکی ہے، لیکن سڑکوں اور پلوں کی مرمت ایک بڑا چیلنج بنی ہوئی ہے۔
