دوحہ(ایچ آراین ڈبلیو) قطر نے اسرائیل سے دوحہ میں ہونے والے فضائی حملے کے لیے سرکاری معافی مانگنے کا مطالبہ کر دیا ہے، جس کے بعد غزہ میں امن ثالثی کے عمل کو بحال کرنے پر غور کیا جا سکے گا۔ اس حملے میں حماس کے پانچ ارکان اور ایک قطری فوجی افسر ہلاک ہو گئے تھے، جس کے نتیجے میں دونوں ممالک کے تعلقات کشیدہ ہو گئے اور امن مذاکرات معطل ہو گئے۔
ذرائع کے مطابق، قطر اسرائیلی معافی کو اپنے افسر کی موت اور خودمختاری کی خلاف ورزی کے اعتراف کے طور پر دیکھ رہا ہے۔ تجزیہ کاروں کا خیال ہے کہ ایک محدود اور واضح معافی ہی موجودہ دیوارِ عدم اعتماد کو ختم کر سکتی ہے اور خطے میں امن عمل کو دوبارہ شروع کرا سکتی ہے۔ اسرائیل کی جانب سے ابھی تک کوئی سرکاری ردعمل سامنے نہیں آیا ہے۔
