کراچی(ایچ آراین ڈبلیو)سندھ حکومت نے ضبط شدہ ٹیمپرڈ، الٹریشن اور ویلڈ شدہ گاڑیوں کی رجسٹریشن اور نیلامی کی باقاعدہ منظوری دے دی ہے۔ صوبائی کابینہ کی اجازت کے بعد اب ایف بی آر اور کسٹمز حکام کی توثیق سے ضبط شدہ اسمگل شدہ گاڑیاں سندھ حکومت کی تحویل میں آجائیں گی۔
صوبائی حکومت کے ترجمان کے مطابق، وفاقی حکومت نے مارچ 2025 سے ایسی گاڑیوں کی رجسٹریشن کا عمل شروع کیا تھا۔ قانونی ترمیمات کے بعد اب سندھ حکومت بھی ضبط شدہ گاڑیوں کو رجسٹر کر سکے گی۔ اس مقصد کے لیے کابینہ نے سندھ موٹر وہیکل رولز 1969 کے پانچویں شیڈول میں باقاعدہ ترمیم کی منظوری دی ہے۔
حکومتی اقدام کے تحت تمام ضبط شدہ گاڑیوں کو مکمل ٹیکنیکل جانچ اور معائنے کے بعد رجسٹر کیا جائے گا۔ ان گاڑیوں کو سرکاری محکموں میں استعمال کیا جا سکے گا یا پھر شفاف نیلامی کے ذریعے فروخت کیا جائے گا۔
اس فیصلے کے دوہرے فوائد ہوں گے: ایک طرف تو ضبط شدہ گاڑیوں کا مناسب استعمال ممکن ہو سکے گا، دوسری جانب سرکاری محکموں کو آمدورفت کے لیے اضافی وسائل میسر آئیں گے۔ یہ اقدام سرکاری خزانے میں اضافے کا بھی باعث بنے گا۔
ماہرین کے مطابق یہ قدم اسمگلنگ کے خلاف جنگ میں اہم کامیابی ہے، جبکہ شفافیت کے ساتھ ضبط شدہ املاک کے استعمال کا یہ ایک مثالی عمل ہے۔
