نیویارک(ایچ آراین ڈبلیو)اقوام متحدہ کی سلامتی کونسل میں ایران پر سے تمام پابندیاں مستقل طور پر ختم کرنے کی قرارداد مسترد کر دی گئی۔ ووٹنگ میں صرف چار ممالک نے ایران کے حق میں ووٹ دیا، جبکہ نو اراکین نے مخالفت کی۔
قرارداد کی حمایت کرنے والے ممالک میں روس، چین، پاکستان اور الجزائر شامل تھے۔ قرارداد کے لیے نو ووٹوں کی ضرورت تھی، لیکن مخالفت کی وجہ سے یہ ناکام ہو گئی۔ اس کے نتیجے میں ایران پر موجود اقتصادی پابندیاں برقرار رہیں گی۔
یہ ووٹنگ برطانیہ، فرانس اور جرمنی کی جانب سے 28 اگست کو شروع کیے گئے 30 روزہ عمل کے تحت ہوئی، جس کا مقصد ایران پر اقوام متحدہ کی پابندیاں دوبارہ عائد کرنا تھا۔ اس عمل کے تحت اگر سلامتی کونسل کسی فیصلے پر متفق نہ ہوتی تو پابندیوں کے خاتمے کی قرارداد پیش کی جا سکتی تھی، لیکن اب ووٹنگ کے نتیجے میں پابندیاں برقرار رہیں گی۔
اس فیصلے سے بین الاقوامی برادری میں ایران کے معاملے پر واضح تقسیم دکھائی دی۔ ایران پر پابندیاں اس کے جوہری پروگرام اور میزائل پروگراموں سے متعلق خدشات کے پیش نظر عائد کی گئی تھیں۔
