اسلام آباد (ایچ آر این ڈبلیو): وفاقی دارالحکومت میں غیرقانونی زمینی قبضوں کے خلاف کارروائی کو تیز کرتے ہوئے محکمہ انتظامیہ نے ایک اعلیٰ سطحی کمیٹی تشکیل دے دی ہے۔ نوٹیفکیشن کے مطابق ڈپٹی کمشنر کی قیادت میں یہ کمیٹی 7 دن کے اندر زمینی قبضوں سے متعلق تفصیلی رپورٹ پیش کرے گی۔
کمیٹی میں آئی ایس آئی، انٹیلی جنس بیورو، ایف آئی اے، اسلام آباد پولیس اور پاکستان نیوی کے نمائندے شامل ہوں گے۔ یہ ٹیم دارالحکومت میں غیرقانونی زمینی قبضوں، مافیا کی کارروائیوں اور انتظامیہ میں ممکنہ ملی بھگت کی تحقیقات کرے گی۔
ذرائع کے مطابق یہ اقدام حالیہ برسوں میں زمینی مافیا کی بڑھتی ہوئی کارروائیوں اور سرکاری زمینوں پر غیرقانونی قبضوں کے خلاف ایک جامع حکمت عملی کا حصہ ہے۔ کمیٹی کو اختیار حاصل ہوگا کہ وہ تمام متعلقہ محکموں سے ریکارڈز طلب کرے اور مجرمانہ غفلت برتنے والے افسران کے خلاف کارروائی کی سفارشات پیش کرے۔
