راولپنڈی (ایچ آراین ڈبلیو) میجر عدنان اسلم شہید (عمر 31 سال، رہائشی راولپنڈی) کی نمازِ جنازہ چکلالہ، راولپنڈی میں ادا کی گئی۔ شہید افسر 2 ستمبر 2025 کو بنوں میں بھارتی ایجنٹ فتنہ الخوارج کے بزدلانہ حملے کے دوران شدید زخمی ہوئے اور بعد ازاں کمبائنڈ ملٹری ہسپتال میں دورانِ علاج جامِ شہادت نوش کیا۔
نمازِ جنازہ میں وزیراعظم پاکستان محمد شہباز شریف، وفاقی وزیر دفاع، وفاقی وزیر اطلاعات، فیلڈ مارشل سید عاصم منیر نشانِ امتیاز (ملٹری)، حیدرِ جنگ (چیف آف آرمی اسٹاف)، عسکری و سول افسران اور شہید کے اہلِ خانہ نے شرکت کی۔
میجر عدنان اسلم نے بے مثال جرات کا مظاہرہ کرتے ہوئے اپنی قیادت اور سپاہ کی رہنمائی میں دشمن کا مقابلہ کیا۔ وزیراعظم نے شہید کی قربانی کو خراجِ تحسین پیش کرتے ہوئے کہا کہ آج ہم نے اس مٹی کے ایک جری سپوت کو کھو دیا ہے، جس کی بہادری اور قربانی ہمیشہ قوم کے دلوں میں زندہ رہے گی۔ وہ پاکستان کی اصل پہچان ہیں: غیر متزلزل عزم، وطن سے بے پناہ محبت اور قربانی کی لازوال روح۔
میجر عدنان کی شہادت اس بات کا ثبوت ہے کہ پاک افواج ہر قسم کی دہشت گردی کے مکمل خاتمے کے لیے پرعزم ہیں۔
شہید افسر کو ان کے آبائی علاقے میں پورے فوجی اعزاز کے ساتھ سپردِ خاک کیا جائے گا۔
