کراچی(ایچ آراین ڈبلیو)وزیراعلیٰ سندھ سید مراد علی شاہ نے پاکستان کے 78 ویں یومِ آزادی کو “معرکۂ حق” کے عنوان سے مناتے ہوئے خوشی کا اظہار کیا اور کہا کہ یومِ آزادی فخر، شکر گزاری اور یکجہتی کا پیغام دیتا ہے۔
یہ پروگرام محکمہ ثقافت کی جانب سے محکمہ بااختیاری برائے معذور افراد (ڈی ای پی ڈی) کے تعاون سے قائداعظم ہاؤس میوزیم میں منعقد کیا گیا۔ تقریب میں صوبائی وزیر ثقافت ذوالفقار شاہ، سیکریٹری ڈی ای پی ڈی طحٰہ فاروقی، سیکریٹری ثقافت خیر محمد، فلم اسٹار جاوید شیخ، ایوب کھوسو اور دیگر شخصیات نے شرکت کی۔
مراد علی شاہ نے کہا کہ خصوصی بچوں کے ساتھ یومِ آزادی منانا ان کے لیے اعزاز کی بات ہے۔ تقریب میں اسکینوسا، سی آرٹس، دارالسکون اور امیدِ نو سمیت مختلف اداروں کے سو سے زائد بچوں نے شرکت کی جنہوں نے اس موقع کو خوشیوں اور رنگوں سے بھر دیا۔
وزیراعلیٰ نے کہا کہ یہ خصوصی بچے اس تقریب کی جان ہیں۔ انہوں نے مزید کہا کہ یہ بچے خوشی، صلاحیت اور جوش و جذبے کا پیغام دیتے ہیں۔ انہوں نے اس موقع پر انصاف، شمولیت اور ایک زیادہ جامع پاکستان کی تعمیر کے عزم کو تازہ کرنے کی ضرورت پر زور دیا۔
مراد علی شاہ نے کہا کہ ہر شہری کو عزت، مساوات اور مواقع ملنے چاہئیں، خواہ اس کی جسمانی یا ذہنی صلاحیت کچھ بھی ہو۔ انہوں نے تمام افراد کو برابر کے حقوق دینے کی اہمیت پر زور دیا۔
پاکستان کی مسلح افواج کو خراجِ تحسین پیش کرتے ہوئے وزیراعلیٰ نے ان کی بہادری، قربانیوں اور سرحدوں کے دفاع کے لیے غیر متزلزل عزم کی تعریف کی۔
وزیراعلیٰ سندھ نے کہا کہ اتحاد، قوت اور انصاف اجتماعی عزم سے پیدا ہوتے ہیں۔ ہر فرد، بالخصوص معاشرے کے کمزور طبقات کا تحفظ ناگزیر ہے۔ خصوصی بچوں کی ترقی اور بحالی سندھ حکومت کی اولین ترجیحات میں شامل ہے۔
مراد علی شاہ نے اعلان کیا کہ خصوصی تعلیم اور بحالی کے مراکز کو تمام اضلاع میں وسعت دی جائے گی۔ معذور افراد کو بااختیار اور خود مختار بنانا ایک بنیادی مقصد ہے۔ انہوں نے کہا کہ ہر فرد کی منفرد صلاحیتوں کو پہچاننا اور سنوارنا ضروری ہے۔
اس مقصد کے لیے حکومت خصوصی بچوں کے لیے فنی اور تخلیقی تربیتی پروگراموں میں توسیع کر رہی ہے تاکہ وہ خود کفیل بن سکیں اور روزگار حاصل کر سکیں۔ وزیراعلیٰ کے مطابق آرٹ، موسیقی، کھیل اور تعلیم کے شعبوں میں خصوصی بچوں کو مواقع فراہم کیے جا رہے ہیں۔
انہوں نے یقین دلایا کہ ابتدائی تشخیص سے لے کر سماجی شمولیت تک سہولیات کا نظام مزید مضبوط کیا جا رہا ہے۔ نجی اداروں اور غیر سرکاری تنظیموں کے ساتھ تعاون سے خدمات کا دائرہ وسیع ہو رہا ہے۔ وزیراعلیٰ نے آٹزم مراکز اور خصوصی تعلیمی اداروں کی لگن، صبر اور جذبے کو سراہا جن کی بدولت زندگیاں بدل رہی ہیں۔ انہوں نے کہا کہ عوامی آگاہی پیدا کرنا اب بھی ایک چیلنج ہے۔ انہوں نے میڈیا سے مثبت کردار ادا کرنے کی اپیل کی۔
محنتی اساتذہ کی خدمات اور خصوصی بچوں کے حوصلے کو سراہتے ہوئے وزیراعلیٰ نے والدین میں آگاہی بڑھانے کی ضرورت پر زور دیا تاکہ وہ اپنے بچوں کو دستیاب سہولیات سے فائدہ دلوا سکیں۔
انہوں نے کہا کہ یومِ آزادی کو شمولیت اور اتحاد کا دن بنایا جائے گا اور سندھ حکومت کی پالیسیوں کے تحت کوئی بچہ پیچھے نہیں رہنے پائے گا۔ ان کے مطابق قومی پرچم آزادی اور شمولیت دونوں کی علامت ہے اور قومی ترانہ اتحاد و ہمدردی کا پیغام ہونا چاہیے۔
مراد علی شاہ نے 78 ویں یومِ آزادی پر پوری قوم کو مبارکباد پیش کی اور پاکستان کی ترقی، امن اور خوشحالی کے لیے نیک خواہشات کا اظہار کیا۔ انہوں نے ملک کے لیے اللہ تعالیٰ کی رہنمائی اور برکتوں کی دعا کی۔
اس سے قبل وزیراعلیٰ کے قائداعظم ہاؤس میوزیم پہنچنے پر خصوصی بچوں نے ان کا پھولوں سے استقبال کیا۔ صوبائی وزیر ثقافت ذوالفقار شاہ اور دیگر اعلیٰ حکام نے ان کا خیرمقدم کیا۔
رنگا رنگ تقریب میں خصوصی بچوں نے وزیراعلیٰ کے ساتھ مل کر قومی پرچم لہرایا۔ تقریب میں سندھی، پنجابی، بلوچی اور پشتو زبانوں میں ثقافتی پروگرام پیش کیے گئے جبکہ بچوں نے اپنی تخلیق کردہ موسیقی بھی پیش کی۔
وزیراعلیٰ اسٹیج پر بچوں کے ساتھ شامل ہوئے، قومی نغمہ گایا، گروپ فوٹو بنوائے اور یومِ آزادی کا کیک کاٹ کر جشن کو مزید یادگار بنا دیا۔صوبائی وزیر ثقافت ذوالفقار شاہ نے اس موقع پر خصوصی بچوں کی شرکت کو سراہتے ہوئے ان کے جذبہ حب الوطنی کی تعریف کی۔ انہوں نے بچوں کے فنکارانہ مظاہروں کو سراہا اور کہا کہ ان کے قومی نغمے ان کے جوش و خروش کا سچا عکس ہیں۔
