واشنگٹن (ایچ آراین ڈبلیو) امریکی صدر ڈونلڈ ٹرمپ نے فاکس نیوز کی معروف میزبان اور سابق پراسیکیوٹر جج جینین پیرو کو واشنگٹن ڈی سی کے لیے عبوری امریکی اٹارنی مقرر کرنے کا اعلان کیا ہے۔ یہ فیصلہ اس وقت سامنے آیا ہے جب اس عہدے کے لیے صدر ٹرمپ کے پہلے نامزد امیدوار کو کانگریس میں ری پبلکن اراکین کی جانب سے سخت مزاحمت کا سامنا تھا۔
وائٹ ہاؤس ذرائع کے مطابق، جینین پیرو کو اس لیے منتخب کیا گیا ہے کیونکہ وہ صدر ٹرمپ کے قریب سمجھی جاتی ہیں اور عدالتی و قانونی نظام میں ان کا وسیع تجربہ ہے۔ وہ ماضی میں نیویارک میں جج اور پراسیکیوٹر کے طور پر خدمات انجام دے چکی ہیں۔
سیاسی مبصرین کا کہنا ہے کہ یہ تقرری خاصی متنازع ہو سکتی ہے کیونکہ جینین پیرو ٹرمپ حکومت کی زبردست حامی سمجھی جاتی ہیں اور ان کی تقاریر اور بیانات اکثر خبروں کی زینت بنتے رہے ہیں۔
یہ تقرری عبوری ہے اور سینیٹ سے منظوری کی متقاضی نہیں، تاہم اس کے سیاسی اثرات دور رس ہو سکتے ہیں۔
