پشاور(ایچ آراین ڈبلیو) پشاور میں فائرنگ کا افسوسناک واقعہ پیش آیا ہے، جہاں معروف معالج ڈاکٹر آصف ملک کو نامعلوم افراد نے نشانہ بنایا۔
اطلاعات کے مطابق ڈاکٹر آصف ملک یونیورسٹی روڈ پر واقع اپنے کلینک سے گھر جا رہے تھے کہ راستے میں نامعلوم حملہ آوروں نے ان پر فائرنگ کر دی۔ واقعے کے بعد انہیں فوری طور پر طبی امداد فراہم کی گئی۔
اس واقعے نے طبی حلقوں سمیت عوام میں شدید تشویش پیدا کر دی ہے۔ شہریوں اور ڈاکٹر برادری نے واقعے کی بھرپور مذمت کرتے ہوئے مطالبہ کیا ہے کہ ملزمان کو جلد از جلد گرفتار کر کے قانون کے کٹہرے میں لایا جائے۔
شہریوں کا کہنا ہے کہ ڈاکٹرز معاشرے کا قیمتی اثاثہ ہیں اور ان پر حملے ناقابل برداشت ہیں۔ عوام نے ڈاکٹر آصف ملک کی جلد صحتیابی کے لیے دعا کی ہے اور واقعے کی شفاف تحقیقات کا مطالبہ کیا ہے۔
