**لاہور (ایچ آراین ڈبلیو):** لاہور کے علاقے سبزہ زار میں 30 سالہ سونیا کے لرزہ خیز قتل کا معمہ حل ہو گیا ہے۔ پولیس کی آپریشنز اور انویسٹی گیشن ونگ کی مشترکہ کارروائی کے دوران انکشاف ہوا ہے کہ مقتولہ کو اس کے اپنے خاوند اور سگی بہن نے مل کر قتل کیا۔
ڈی آئی جی آپریشنز فیصل کامران اور ڈی آئی جی انویسٹی گیشن سید ذیشان رضا کی جانب سے دیے گئے ٹاسک پر ایس پی اقبال ٹاؤن سدرہ خان کی سربراہی میں پولیس ٹیم نے پیشہ ورانہ مہارت اور ہیومن انٹیلیجنس کا استعمال کرتے ہوئے ملزمان کو گرفتار کیا۔ مقتولہ کی والدہ کی مدعیت میں تھانہ سبزہ زار میں قتل کا مقدمہ درج کیا گیا تھا۔
ایس پی سدرہ خان کے مطابق، مقتولہ کی بہن اور خاوند کے آپس میں ناجائز تعلقات تھے اور وہ دونوں شادی کرنا چاہتے تھے۔ اسی مقصد کی راہ میں حائل سونیا کو راستے سے ہٹانے کے لیے سفاک ملزم نے پہلے اس کا گلا دبایا اور پھر چھریوں کے وار کر کے اسے موت کے گھاٹ اتار دیا۔ پولیس کا کہنا ہے کہ ملزمان کے خلاف مضبوط چالان مرتب کیا جائے گا تاکہ انہیں قرار واقعی سزا دلوائی جا سکے۔ ڈی آئی جی آپریشنز اور انویسٹی گیشن نے کامیاب کارروائی پر پولیس ٹیم کے لیے تعریفی سرٹیفکیٹ کا اعلان کیا ہے۔
—
**آزاد صحافت کی حمایت کریں:** ایچ آراین ڈبلیو پر ہم حقائق پر مبنی رپورٹنگ کے لیے پرعزم ہیں۔ آپ کا تعاون ہمیں شفاف اور بے باک صحافت جاری رکھنے میں مدد دیتا ہے۔ آج ہی [hrnw.com/support-us](https://www.google.com/search?q=https://hrnw.com/support-us) پر جا کر ہماری حمایت کریں۔
