**کراچی، (ایچ آراین ڈبلیو)** — پاکستان رینجرز (سندھ) نے خفیہ معلومات کی بنیاد پر کارروائی کرتے ہوئے کراچی کے علاقے شاہ ٹاؤن فیز 3 سے ڈکیتی اور اسٹریٹ کرائم کی متعدد وارداتوں میں ملوث **ابڑو گینگ** کے سرغنہ سمیت چار ملزمان کو گرفتار کر لیا۔
ترجمان رینجرز کے مطابق گرفتار ملزمان میں **منور علی ولد حاجی نذر، عدیل علی ولد اوشاق علی، مظہر علی ولد حاجی نذر اور رضوان علی ولد ندیم احمد** شامل ہیں۔ کارروائی کے دوران ملزمان کے قبضے سے **دو موبائل فون اور نقدی** بھی برآمد کر لی گئی۔
رینجرز حکام کے مطابق گرفتار ملزمان اپنے دیگر ساتھیوں کے ساتھ مل کر کراچی کے مختلف علاقوں **شاہ لطیف ٹاؤن، شاہ ٹاؤن، رزاق آباد جوگی موڑ، پیپری، گلشن حدید اور قائد آباد** سمیت ملحقہ علاقوں میں اسلحے کے زور پر شہریوں سے موبائل فون اور نقدی چھیننے کی متعدد وارداتوں میں ملوث رہے ہیں۔
ابتدائی تفتیش کے مطابق گرفتار ملزم **رضوان** اسٹریٹ کرائم کی وارداتوں کے علاوہ **پاکستان اسٹیل ملز** سے لوہا اور پیتل چوری کرنے میں بھی ملوث رہا ہے۔
رینجرز حکام کا کہنا ہے کہ گرفتار ملزمان کے دیگر ساتھیوں کی گرفتاری کے لیے مختلف مقامات پر چھاپے مارے جا رہے ہیں۔ بعد ازاں گرفتار ملزمان کو برآمد شدہ سامان سمیت مزید قانونی کارروائی کے لیے پولیس کے حوالے کر دیا گیا ہے۔
رینجرز نے عوام سے اپیل کی ہے کہ جرائم پیشہ عناصر کے خاتمے کے لیے ایسے افراد کے بارے میں اطلاع فوری طور پر قریبی رینجرز چیک پوسٹ، رینجرز ہیلپ لائن **1101** یا رینجرز مددگار واٹس ایپ نمبر **03479001111** پر کال یا پیغام کے ذریعے دیں۔ اطلاع دینے والے کا نام صیغۂ راز میں رکھا جائے گا۔
