حیدرآباد(ایچ آراین ڈبلیو)لوکل گورنمنٹ ڈیپارٹمنٹ میں مبینہ کرپشن، جعلی احکامات، غیر قانونی تقرریوں اور اختیارات کے ناجائز استعمال سے متعلق سنگین الزامات سامنے آئے ہیں۔ ان الزامات میں ایڈیشنل ڈائریکٹر لوکل گورنمنٹ حیدرآباد عبدالجبار ٹگڑ کا نام لیا جا رہا ہے، جس پر مختلف حلقوں کی جانب سے تشویش کا اظہار کیا جا رہا ہے۔
ذرائع کے مطابق محکمہ لوکل گورنمنٹ میں مبینہ طور پر بغیر اختیار احکامات جاری کیے گئے، غیر قانونی تبادلے اور پوسٹنگز کی گئیں، ترقیاتی اسکیموں میں مالی بے ضابطگیوں کے خدشات ظاہر کیے جا رہے ہیں، جبکہ بعض فیصلے پسند و ناپسند کی بنیاد پر کیے جانے کا بھی الزام ہے۔ ذرائع کا کہنا ہے کہ یہ تمام اقدامات سندھ لوکل گورنمنٹ ایکٹ اور سرکاری سروس رولز کی مبینہ خلاف ورزی کے زمرے میں آتے ہیں، جس سے عوامی اداروں کی ساکھ متاثر ہونے کا اندیشہ ہے۔
اس معاملے پر متعدد اہم سوالات اٹھائے جا رہے ہیں، جن میں یہ شامل ہے کہ مبینہ جعلی احکامات کس اختیار کے تحت جاری کیے گئے، اس عمل میں کن کن افسران کا کردار رہا، اور اگر بے ضابطگیاں ہوئیں تو تاحال ان کے خلاف کارروائی کیوں عمل میں نہیں لائی گئی۔
ذرائع کا مزید کہنا ہے کہ آئندہ دنوں میں مبینہ طور پر مزید دستاویزی شواہد، احکامات کی نقول اور تفصیلات منظرِ عام پر لانے کا عندیہ دیا گیا ہے۔
سماجی اور عوامی حلقوں کی جانب سے اعلیٰ حکام، اینٹی کرپشن اسٹیبلشمنٹ، نیب، ایف آئی اے اور سندھ حکومت سے مطالبہ کیا جا رہا ہے کہ معاملے کی فوری، غیر جانبدار اور شفاف تحقیقات کرائی جائیں، مبینہ جعلی احکامات کا جائزہ لے کر قانونی کارروائی کی جائے اور اگر الزامات ثابت ہوں تو ذمہ داران کو قانون کے مطابق جوابدہ بنایا جائے۔
واضح رہے کہ تاحال متعلقہ افسر کی جانب سے ان الزامات پر کوئی باضابطہ مؤقف سامنے نہیں آیا ہے۔
