کراچی(ایچ آراین ڈبلیو) لانڈھی پولیس نے 7 سالہ معصوم بچے کے ساتھ زیادتی اور قتل کے واقعے کے دو مرکزی ملزمان کو مخبر خاص کی اطلاع پر گرفتار کر لیا ہے۔ ایس پی لانڈھی فائزہ سودر نے اس پیشرفت کی تصدیق کرتے ہوئے کہا کہ “ایسے بے شرم اور شیطانی کام کرنے والوں کو عدالت میں پیش کیا جائے گا۔”
ایس پی لانڈھی نے مزید کہا کہ “گرفتار ملزمان کے خلاف قانونی کارروائی مکمل کر کے انہیں کیفرکردار تک پہنچانا ہماری اولین ترجیح ہے۔ ہم ایسے مجرموں کے خلاف کسی رعایت کے قائل نہیں ہیں۔”
یہ واقعہ گزشتہ روز پیش آیا تھا، جب معصوم بچے کی لاش لانڈھی کے ایک ویران علاقے سے برآمد ہوئی تھی۔ پولیس نے مخبر خاص کی معلومات کی بنیاد پر کارروائی کرتے ہوئے ملزمان کو گرفتار کیا۔ پولیس کے مطابق گرفتاریاں واقعے کی نوعیت کی سنگینی کے پیش نظر فوری کی گئی ہیں۔
علاقے کے رہائشیوں نے ملزمان کی گرفتاری پر اطمینان کا اظہار کیا ہے، تاہم ان کا مطالبہ ہے کہ ایسے مجرموں کو سزائے موت دی جائے۔ پولیس نے عوام کو یقین دلایا ہے کہ کیس کی تیز رفتاری سے سماعت کو یقینی بنایا جائے گا۔
