اسلام آباد(ایچ آراین ڈبلیو)وفاقی دارالحکومت میں یکم اکتوبر سے بغیر ڈرائیونگ لائسنس گاڑی چلانے والوں کے خلاف سخت اقدامات کا فیصلہ کیا گیا ہے۔ آئی جی اسلام آباد نے ٹریفک پولیس کو واضح ہدایات جاری کی ہیں کہ خلاف ورزی کرنے والوں کے خلاف مقدمات درج کیے جائیں اور گرفتاریاں عمل میں لائی جائیں۔
ذرائع کے مطابق، نئے احکامات کے تحت:
یکم اکتوبر کے بعد بغیر ڈرائیونگ لائسنس گاڑی چلانے پر فوری مقدمات درج ہوں گے
گرفتار ہونے والے ڈرائیورز کی شخصی ضمانت ممکن نہیں ہوگی
خلاف ورزی کی صورت میں لائسنس حاصل کرنے تک کریکٹر سرٹیفکیٹ جاری نہیں کیا جائے گا
سرکاری ڈرائیورز کی سہولت کے لیے خصوصی انتظامات کیے گئے ہیں۔ محکمہ ٹرانسپورٹ نے سرکاری دفاتر میں ہی ڈرائیونگ لائسنس بنوانے کی سہولت فراہم کی ہے تاکہ سرکاری ملازمین آسانی سے اپنے لائسنس حاصل کر سکیں۔
ٹریفک پولیس کے ترجمان نے بتایا کہ “یہ اقدام عوامی سلامتی کو یقینی بنانے کے لیے ضروری ہے۔ ہم عوام سے اپیل کرتے ہیں کہ وہ یکم اکتوبر سے پہلے اپنے ڈرائیونگ لائسنس کی تجدید کریں یا نئے لائسنس حاصل کریں۔”
شہریوں کی آگاہی کے لیے ٹریفک پولیس نے سوشل میڈیا پر مہم بھی شروع کی ہے اور SMS کے ذریعے ڈرائیورز کو بروقت اطلاعیں بھیجی جا رہی ہیں۔ یہ اقدام گاڑی چلانے کے قواعد و ضوابط کی پاسداری کو یقینی بنانے اور سڑکوں پر ہونے والے حادثات کو کم کرنے کے مقصد سے لیا گیا ہے۔
