پنڈی بھٹیاں(ایچ آراین ڈبلیو)شہر کے علاقے سکھیکی منڈی میں ایک نجی اکیڈمی کی چھت اچانک گرنے سے چھ افراد ہلاک ہو گئے، جن میں چار معصوم بچے بھی شامل ہیں۔ ہلاکتوں میں اکیڈمی کے مالک اور ان کا بیٹا بھی شامل ہیں۔
تفصیلات کے مطابق، دوپہر کے وقت اچانک عمارت کی چھت گرنے سے داخل ہونے والے طلبا اور عملہ ملبے میں دب گیا۔ ریسکیو اداروں کی فوری کارروائی کے نتیجے میں دو زخمی بچوں کو ملبے سے نکال کر فوری طور پر ٹیچ ہسپتال منتقل کیا گیا، جہاں ان کی حالت تشویشناک بتائی جا رہی ہے۔
اسسٹنٹ کمشنر پنڈی بھٹیاں خود موقع پر پہنچ کر ریسکیو آپریشن کی نگرانی کر رہے ہیں۔ ابتدائی رپورٹس کے مطابق، عمارت کی غیر معیاری تعمیر اور ساختی کمزوریاں اس حادثے کی ممکنہ وجوہات ہو سکتی ہیں۔
مقامی افراد نے بتایا کہ اکیڈمی کی عمارت پرانی تھی اور ممکنہ طور پر اس کی مرمت پر توجہ نہیں دی گئی تھی۔ واقعے کے بعد علاقے میں غم اور سکتے کا ماحول ہے۔
ضلعی انتظامیہ نے متاثرہ خاندانوں سے اظہار تعزیت کیا ہے اور واقعے کی تفتیش کے احکامات جاری کیے ہیں۔ زخمیوں کے لیے فری ایمرجنسی سروسز کا بندوبست کیا گیا ہے۔
