لاہور (ایچ آراین ڈبلیو):** کاؤنٹر ٹیررازم ڈیپارٹمنٹ (سی ٹی ڈی) پنجاب نے صوبے کے مختلف اضلاع میں انٹیلی جنس بیسڈ کارروائیوں کے دوران مختلف کالعدم تنظیموں سے وابستہ **18 مبینہ دہشت گردوں کو گرفتار** کرکے دہشت گردی کے ممکنہ منصوبے ناکام بنانے کا دعویٰ کیا ہے۔
سی ٹی ڈی ترجمان کے مطابق صوبے کے مختلف اضلاع میں **117 انٹیلی جنس بیسڈ آپریشنز** کیے گئے، جن کے دوران 117 افراد سے پوچھ گچھ کی گئی اور 18 مبینہ دہشت گردوں کو گرفتار کیا گیا۔
گرفتار افراد میں حسن عباس شاہ، محمد حنیف، سمیع اللہ عرف طالب جان، محمد حسنین، حافظ محمد عبداللطیف، عطاء اللہ، فیض اللہ، محمد شہزاد عرف پاما، محمد بلال، محمد انس، طاہر، وقار احمد، محمد احسن، محمد فرمان، محمد نعمان، عمر فاروق، عبدالوہاب اور شوکت علی شامل ہیں۔
ترجمان کے مطابق گرفتار افراد کا تعلق فیصل آباد، سیالکوٹ، سرگودھا، ساہیوال، حافظ آباد، گوجرانوالہ، بھکر، لاہور اور ملتان سے ہے اور ان کے روابط مختلف کالعدم تنظیموں سے بتائے گئے ہیں۔
سی ٹی ڈی کے مطابق کارروائیوں کے دوران **3,185 گرام دھماکہ خیز مواد، 8 ڈیٹونیٹرز، 13.1 فٹ سیفٹی فیوز، 4.5 فٹ پرائما کارڈ، 21 گولیوں سمیت 4 پستول، 13 کالعدم کتابیں، 23 ممنوعہ رسالے، 65 پمفلٹس، 84 اسٹیکرز، 7 موبائل فونز اور 42,740 روپے نقدی** برآمد کیے گئے۔
ترجمان کا کہنا ہے کہ گرفتار افراد کے خلاف قانونی کارروائی شروع کردی گئی ہے جبکہ ان سے مزید تفتیش جاری ہے۔
سی ٹی ڈی ترجمان کے مطابق گزشتہ دو ہفتوں کے دوران مقامی پولیس اور دیگر قانون نافذ کرنے والے اداروں کے تعاون سے پنجاب بھر میں **3,357 کومبنگ آپریشنز** کیے گئے۔ ان کارروائیوں میں **121,433 افراد کو چیک، 274 افراد کو گرفتار، 263 مقدمات درج** کیے گئے جبکہ مختلف نوعیت کی 244 برآمدگیاں بھی کی گئیں۔
ترجمان نے کہا کہ سی ٹی ڈی پنجاب دہشت گردی اور ریاست مخالف عناصر کے خلاف کارروائیاں جاری رکھے ہوئے ہے اور عوام کے تحفظ کے لیے تمام ممکنہ اقدامات کیے جا رہے ہیں۔
