کراچی(ایچ آراین ڈبلیو) ڈسٹرکٹ کیماڑی کے صنعتی علاقے سائٹ بی تھانے کی حدود میں ممنوعہ چھالیہ، غیر قانونی آئل کی ترسیل اور مبینہ پولیس سرپرستی کے الزامات سامنے آئے ہیں۔ ایک رپورٹ میں دعویٰ کیا گیا ہے کہ ویڈیو شواہد میں بعض موٹر سائیکلوں اور گاڑیوں کو مبینہ طور پر ممنوعہ سامان کی ترسیل کرتے ہوئے دیکھا جا سکتا ہے۔
رپورٹ کے مطابق یہ گاڑیاں اور موٹر سائیکلیں مبینہ طور پر علاقے میں بغیر کسی رکاوٹ کے سرگرم ہیں، جس پر مقامی حلقوں نے قانون نافذ کرنے والے اداروں کی کارکردگی پر سوالات اٹھائے ہیں۔ تاہم ان الزامات کی سرکاری سطح پر تصدیق نہیں ہوئی ہے۔
ذرائع کا دعویٰ ہے کہ بعض پولیس اہلکاروں اور جرائم پیشہ عناصر کے درمیان مبینہ گٹھ جوڑ کی بھی شکایات سامنے آئی ہیں، تاہم اس حوالے سے متعلقہ پولیس حکام کی جانب سے کوئی باضابطہ مؤقف جاری نہیں کیا گیا۔
شہریوں اور سماجی حلقوں نے اعلیٰ پولیس حکام سے مطالبہ کیا ہے کہ سامنے آنے والے ویڈیو شواہد اور الزامات کی شفاف تحقیقات کرائی جائیں، اور اگر کوئی اہلکار یا فرد غیر قانونی سرگرمیوں میں ملوث پایا جائے تو اس کے خلاف قانون کے مطابق کارروائی عمل میں لائی جائے۔
