کراچی(ایچ آراین ڈبلیو)مرکزی ترجمان پاکستان پیپلز پارٹی پارلیمنٹرینز شازیہ مری نے کہا ہے کہ گلگت بلتستان میں آزاد اور شفاف انتخابات کا انعقاد یقینی بنایا جائے۔
گلگت بلتستان میں انتخابی صورتحال پر گفتگو کرتے ہوئے انہوں نے کہا کہ بعض سیاسی عناصر مبینہ طور پر پری پول رگنگ کے ذریعے انتخابی عمل پر اثر انداز ہونے کی کوشش کر رہے ہیں۔
شازیہ مری کا کہنا تھا کہ چیئرمین بلاول بھٹو زرداری کی بڑھتی ہوئی مقبولیت کے باعث سیاسی مخالفین بوکھلاہٹ کا شکار ہیں اور مختلف حلقوں سے انتخابی بے ضابطگیوں کی شکایات سامنے آ رہی ہیں۔
انہوں نے کہا کہ بعض علاقوں میں انتظامی افسران کے تبادلے اور ووٹر لسٹوں میں ردوبدل کی اطلاعات تشویشناک ہیں، جبکہ انتخابی عمل کو متنازع بنانے کی کوششیں جمہوری اصولوں کے منافی ہیں۔
ترجمان پیپلز پارٹی نے مطالبہ کیا کہ الیکشن کمیشن آف پاکستان آئین کے تحت اپنی ذمہ داریاں پوری کرے اور تمام سیاسی جماعتوں کو یکساں مواقع فراہم کیے جائیں تاکہ انتخابات شفاف اور غیر جانبدار ہوں۔
