**کوٹلی کھوکھراں (ایچ آراین ڈبلیو)** – سوشل میڈیا پر اپنی منفرد پہچان رکھنے والے معروف ٹک ٹاکر حکیم بابر کو ایک دعوت کے دوران جوس میں مبینہ طور پر زہریلی چیز ملا کر پلانے کے الزام میں تھانہ بیگووالا پولیس نے دو ملزمان کے خلاف باقاعدہ مقدمہ درج کر لیا ہے۔
تفصیلات کے مطابق، سمبڑیال کے علاقے کوٹلی کھوکھراں میں پیش آنے والے اس واقعے کے بعد، تھانہ بیگووالا پولیس نے مدعی محمد افضال کی درخواست پر کارروائی کرتے ہوئے ملزمان صفدر (عرف سکونے) اور علی چوہان کے خلاف تعزیراتِ پاکستان کی دفعہ 337J کے تحت مقدمہ نمبر 279/26 درج کر لیا ہے۔
پولیس کو دی گئی درخواست میں مؤقف اختیار کیا گیا ہے کہ سوشل میڈیا پر شہرت اور حسد کی بنا پر ملزمان نے مبینہ منصوبہ بندی کے تحت حکیم بابر کو جوس میں کوئی زہریلی چیز ملا کر پلائی، جس کے باعث ان کی حالت انتہائی غیر ہو گئی۔ واقعے کے فوری بعد ٹک ٹاکر حکیم بابر کو تشویشناک حالت میں تحصیل ہیڈ کوارٹر (THQ) ہسپتال منتقل کیا گیا تھا، جہاں ڈاکٹرز کی جانب سے فوری طبی امداد دیے جانے اور حالت میں بہتری آنے کے بعد اب انہیں ہسپتال سے ڈسچارج کر دیا گیا ہے۔
بیگووالا پولیس حکام کا کہنا ہے کہ مقدمہ درج کر کے واقعے کی باقاعدہ اور شفاف تحقیقات کا آغاز کر دیا گیا ہے۔ پولیس انتظامیہ کے مطابق، معاملے کی اصل حقیقت اور جوس میں ملائی گئی مبینہ چیز کا سائنسی تعین کرنے کے لیے نمونے حاصل کر کے فرانزک لیبارٹری بھجوا دیے گئے ہیں، جن کی رپورٹ کی روشنی میں مزید قانونی کارروائی عمل میں لائی جائے گی۔
—
**انسانی حقوق کے تحفظ کے لیے ہماری آواز بنیں!**
دنیا کے نمبر 1 ہیومن رائٹس پورٹل **HRNW** کی مدد کریں۔ مظلوموں کی آواز بننے اور انسانی حقوق کے فروغ کے لیے اس لنک پر کلک کر کے ہمیں سپورٹ کریں:
[https://www.hrnww.com/?page_id=1083]()
