دبئی(ایچ آراین ڈبلیو)دبئی حکومت نے نیا گولڈ ڈسٹرکٹ باقاعدہ طور پر افتتاح کر دیا ہے، جس میں دنیا کی پہلی گولڈ اسٹریٹ جلد شروع کی جائے گی۔دبئی کے گولڈ ڈسٹرکٹ کو نیا سیاحتی مقام بنانے کا منصوبہ ہے، جہاں ہزار سے زائد گولڈ ریٹیلرز کے ساتھ جدید تجارتی مرکز تعمیر کیا جائے گا۔ منصوبے اور ڈیزائن کو مرحلہ وار منظر عام پر لایا جائے گا۔
دبئی حکومت کے مطابق اس جدید مرکز میں ریٹیل، ہول سیل اور سرمایہ کاری کے تمام پہلوؤں کو ایک جگہ جمع کیا جائے گا، جبکہ مکمل سونے اور زیورات کی ویلیو چین بھی ایک ہی مقام پر موجود ہوگی۔
اماراتی حکام کا کہنا ہے کہ یہ منصوبہ دبئی کی شان اور تجارتی ورثے کی علامت ہوگا اور دنیا بھر کے سیاحوں اور تاجروں کے لیے اہم کشش کا سبب بنے گا۔
