اسلام آباد(ایچ آراین ڈبلیو) ورلڈ بینک کی حالیہ رپورٹ میں پورٹ قاسم کو دنیا کی نویں سب سے ترقی یافتہ بندرگاہ قرار دیا گیا ہے۔ وفاقی وزیر بحری امور محمد جنید انوار چوہدری نے ایک بیان میں اس اعزاز کو پاکستان کی کامیابی قرار دیتے ہوئے کہا کہ یہ حکومتی اصلاحات اور جدیدیت کا ثمر ہے۔
وزیر بحری امور نے کہا کہ “پورٹ قاسم کی عالمی رینکنگ میں یہ پوزیشن پاکستان کے لیے ایک بڑا اعزاز ہے۔ قاسم انٹرنیشنل کنٹینر ٹرمینل نے جدید آپریشنز میں کلیدی کردار ادا کیا ہے۔”
انہوں نے مزید کہا کہ پاکستان بندرگاہوں کے آپریشنز کو عالمی معیار پر لا کر خطے کا شپنگ ہب بن رہا ہے، جس سے سرمایہ کاروں کے اعتماد میں اضافہ ہوگا۔
پورٹ قاسم کراچی کے قریب واقع پاکستان کی دوسری سب سے بڑی بندرگاہ ہے، جو ملک کی تقریباً 60 فیصد سمندری تجارت کی گزرگاہ ہے۔ یہ بندرگاہ پاکستان کی معاشی ترقی میں اہم کردار ادا کرتی ہے اور کراچی پورٹ ٹرسٹ کے زیرانتظام کام کرتی ہے۔
یہ درجہ بندی بین الاقوامی تجارت کے میدان میں پاکستان کی بڑھتی ہوئی صلاحیتوں کا منہ بولتا ثبوت ہے۔
