**کراچی (ایچ آراین ڈبلیو):** ڈسٹرکٹ ایسٹ پولیس نے کارروائی کرتے ہوئے مبینہ طور پر منشیات فروشی میں ملوث ملزم کو گرفتار کر لیا۔ پولیس کے مطابق گرفتار ملزم بدنامِ زمانہ منشیات فروش انمول عرف پنکی کا بھائی ہے۔
پولیس ترجمان کے مطابق تھانہ جمشید کوارٹرز پولیس نے خفیہ اطلاع پر گھوڑا چورنگی کے قریب کارروائی کرتے ہوئے ملزم **کامران مراد** کو گرفتار کیا۔
پولیس کا کہنا ہے کہ گرفتار ملزم کے قبضے سے **2 کلو گرام سے زائد اعلیٰ کوالٹی کی چرس** اور **آدھا کلو آئس** برآمد کی گئی، جبکہ ملزم کے پاس سے موبائل فون، پرس، شناختی کارڈ اور نقد رقم بھی تحویل میں لی گئی۔
ابتدائی تفتیش کے مطابق پولیس کا دعویٰ ہے کہ ملزم کراچی کے مختلف علاقوں میں چرس، آئس اور ہیروئن سپلائی کرتا تھا اور نوجوانوں کو منشیات کے استعمال کا عادی بنانے میں ملوث رہا ہے۔
پولیس کے مطابق ملزم کامران مراد عادی مجرم ہے جو اس سے قبل بھی منشیات فروشی کے مقدمات میں گرفتار ہو کر جیل جا چکا ہے۔
ملزم کے خلاف تھانہ جمشید کوارٹرز میں منشیات سے متعلق دو مقدمات درج کر لیے گئے ہیں، جبکہ گرفتار ملزم سے انمول عرف پنکی کے مبینہ نیٹ ورک اور دیگر ساتھیوں کے حوالے سے مزید تفتیش جاری ہے۔
**HRNW کی اپیل:**
آزاد، ذمہ دار اور عوامی مفاد پر مبنی صحافت کے فروغ میں ہمارا ساتھ دیں۔ HRNW کی معاونت کے لیے وزٹ کریں: [https://www.hrnww.com/?page_id=1083](https://www.hrnww.com/?page_id=1083)
**ڈسکلیمر:**
یہ خبر پولیس کے جاری کردہ بیان اور ابتدائی تفتیشی معلومات پر مبنی ہے۔ گرفتار ملزم کے خلاف الزامات کا حتمی فیصلہ قانونی کارروائی اور عدالت کے فیصلے کے بعد ہوگا۔
